Бүгүн Кыргыз Республикасына Өзбекстандын делегациясы келет

Бүгүн, 26-октябрда Кыргыз Республикасына Өзбекстандын делегациясы келет. Бул тууралуу өкмөттүн басма сөз кызматынан билдиришти.

Маалыматка ылайык, өзбек делегациясын премьер-министрдин орун басары Адхам Икрамов жетектеп келет. Алардын катарында Анжиян, Наманган, Фергана облустарынын жетекчилери, тийиштүү министрликтердин, укук коргоо органдарынын кызматкерлери, агартуу, маданият спорт тармагынын өкүлдөрү жана дин аалымдары келишет.

"Ош облусуна Өзбекстандын делегациясы келет. Аларды Кыргыз Республикасынын Биринчи вице-премьер-министри Мухаммедкалый Абылгазиев, вице-премьер-министр Жеңиш Разаков баштаган расмий өкүлдөр, Ош, Жалал-Абад, Баткен облусунун жетекчилери, коомдук-маданий ишмерлер тосуп алышат. Иш-чаранын жүрүшүндө Ош шаарынын борбордук аянтында маданий-майрамдык салтанат өтөт. Мындан сырткары борбордук аянтта айыл чарба продукцияларынын жарманкеси орун алат", - деп билдирди басма сөз кызматы.

Белгилүү болгондой, өзбек делегациясынын сапарынын негизги максаты - достук жана коңшулук мамилелерди бекемдөө. Келген конокторго "Манастын уулу Семетей" аталышындагы театрлаштырылган программа тартууланат. Андан соң делегация медицина факультетинин студенттери менен жолугат. Сапардын алкагында келген коноктор "Сулайман-Тоо" тарыхый-этнографиялык комплексине барышат.

Эске салсак, биринчи вице-премьер-министр Мухаммедкалый Абылгазиев баштаган Кыргыз Республикасынын делегациясы 2016-жылдын 1-октябрында Өзбекстан Республикасынын Анжиян облусуна барган.