Бильярд спорту боюнча Дүйнө биринчилигинде Каныбек Сагынбаев менен Дастан Лепшаков кийинки турга өтүштү

Бишкекте өтүп жаткан бильярд спорту боюнча эркектер арасында Дүйнө биринчилигинде 7 спортчу 2-турга өттү. Бул тууралуу бүгүн, 26-октябрда SUPER.KG порталына бильярд спортунун чебери Дастан Лепшаков билдирди.

"Бишкекте бильярд боюнча өтүп жаткан Дүйнө биринчилигинде 1-турда 2008-жылдагы Дүйнөнүн күмүш медалынын ээси казакстандык Даврен Уринбаев менен кез келип, 7:4 эсебинде утуп алдым. Эми 27-октябрда украиналык Ярослав Торнаведский менен беттешем. Ал эми Дүйнөнүн 3 жолку чемпиону Каныбек Сагынбаев өзбекстандык Надыр Мирзоевди утуп алды", - деп билдирди Лепшаков.

Маалыматка ылайык, Кыргыз Республикасынын атынан катышкан 7 спортчу кийинки турга өткөн. 27-октябрда Каныбек Сагынбаев казакстандык Алибек Омаров менен ойномокчу.

Эске салсак, Бишкек шаарында бильярд боюнча эркектер арасында Дүйнө биринчилиги 25-октябрда башталган. Ага Кыргыз Республикасынан 22 спортчу катышуу мүмкүнчүлүгүн алган.