Сузакта асынып алган баланын каты: "Апамды эле күтүп жүрөм, аны бир көрсөм болду"

Сузак районунун Сымкат айылында он гүлүнүн бир гүлү ачыла элек кырчындай өмүр кыйылды. Бул окуя 23-октябрь күнү саат 16:30 чамасында болгон. Анда 2002-жылы туулган Шерзат Алимбеков өз үйүнүн короосунда асынып алган.

Маркумдун атасынын иниси Эркин Алимбеков тууганынын өлүмүнө айылдашы Кубанычбек Токтосунов себепкер экенин айтат.

“Кубанычбек Токтосунов 15-октябрь түнү Шерзатты айылдын четиндеги алма бакта “10 миң сом уурдаганыңды мойнуңа аласың” деп сабаган. "Бакка асып коём" дегенинен корккон Шерзат кылбаган ишти мойнуна алган. Мындан улам атасы 10 миң сом төлөп бериптир. Кийин Шерзат мага ак экенин айтып, милиция алып койгон 3900 сомун алып берүүмдү өтүндү. Милицияга барсак “Ошол акчаны кантип сурап жатасыңар? Ишти башынан тергейбиз, баланы камакка алабыз” деп коюшту. Болгонун Шерзатка айтып берсем, “Аба, сиз да мага ишенбедиңиз, акырына чейин турам дедиңиз эле, турган жоксуз. Мен аны далилдеп берем. Ошондо түшүнөсүз” деген. Мен ага анча көңүл бурган эмес болчумун”, - дейт Эркин Алимбеков.

Ал эми маркум калтырып кеткен катта Орусиядагы апасын сагынганы жана эч кандай уурулук кылбаганы жазылган.

“Мен Бакыт акенин 10 миң сомун алган эмесмин. Анын баласы түнкү саат 2де алма бакта сабаганынан өлтүрүп коёбу деп мойнума алгам. Мылтыгынын мага эмне кереги бар? Аны кантип көтөрүп жүрмөк элем? 3900 сом менин акчам болчу. Анын 2000 сомун туалет казып алгам. Калганын чогултуп жүргөм. Ата, сиз мени ууру деп ойлобоңуз. Ал жерде мен акмын. Ак экенимди далилдеп берем. Мен азыр апамды эле күтүп жүрөм. 2-3 күндөн кийин келсе, аны бир көрсөм эле болду. Өзүмдүн жана сиздин акчаңызды да төлөтүп берем. Акыркы сөзүм - мен акмын!”

Шерзат Сымкат айылында атасы менен бирге турчу. Ал эми бир тууган агасы менен апасы Орусияда иштеп жүрүшкөн. Шерзат тирүү турганда 2-3 күндөн кийин эле апасы чоң атасынын ашына келери күтүлүп жаткан. Эми минтип сыздаган эне уулун акыркы сапарга узатууга келип отурат.

Бул окуядан кийин баланын атасы милицияга арыз менен кайрылып, Кубанычбек Токтосуновду жоопко тартууну суранган.

“1992-жылы туулган Кубанычбек Токтосуновдун мектеп окуучусун сабаганы боюнча кылмыш иши козголду. Учурда тергөө амалдары жүрүп жатат. Ал эми аймактык милиция кызматкери боюнча кызматтык иликтөө жүрүүдө. Азырынча анын жыйынтыгы чыга элек”, - деп билдиришти Жалал-Абад ОИИБинин басма сөз кызматы.

Ал эми кылмышка шектелип жаткан Кубанычбек Токтосуновдун атасы Бакыт Токтосунов баласынын эч кандай күнөөсү жок экенин айтты: “Аны эч ким кыйнаган эмес, мойнуна өзү алган. Атасы улам келгенинен эч кандай доом жок деп жазып бергем”.

Толук маалыматты "Супер-Инфо" гезитинин №730-санынан окуй аласыздар.