Салык органынын 22 кызматкери жазага тартылды

Мамлекеттик салык кызматы 9 ай аралыгындагы жарандардын кайрылуусу боюнча салык органдарынын 22 кызматкерин жазага тартты. Бул тууралуу Мамлекеттик салык кызматы бүгүн, 1-ноябрда билдирди.

"10 кызматкерге эскертүү берилип, 4 кызматкерге катуу сөгүш жарыяланса, 8 кызматкер сөгүш алды. 2016-жылы Мамлекеттик салык кызматына 9 ай ичинде ар кандай даттануулар, сунуштар менен 177 жаран кайрылган. Мындан тышкары электрондук дарекке 63 кат келген. Аймактык салык органдарына 64 кайрылуу түшсө, "ишеним телефонуна" 15 билдирүү түшкөн. Алардын ичинен 7 факт тастыкталып, чара көрүлдү. Ал эми 8 кайрылуу боюнча факт тастыкталган эмес", - деп айтылат маалыматта.

Ошондой эле Салык кызматынын жетекчилиги 9 айда 100 адамды кабыл алганы белгилүү болду. Алардын 31и жеке суроолор менен, 47си салык мыйзамы боюнча, 12си социалдык жана 10у кадр маселелери боюнча кайрылышкан.