Бишкекте 10го жакын студент бала менен мушташып, бирин бычактаган жаран кармалды

Борбор калаада студент баланы бычактаган жаран кармалды. Бул тууралуу бүгүн, 2-ноябрда Бишкек шаардык ички иштер башкы башкармалыгынан билдиришти.

Маалыматка караганда, окуя 18-октябрь күнү саат 13:00 чамасында Чүй-Абдрахманов көчөсүндө орун алган. Анда аялы менен бараткан жаран менен 10го жакын студент балдар мушташа кетишкен. Жыйынтыгында студент балдардын бири 2000-жылы туулган А.У. бычактан жараат алган. Кийин ал ооруканага жеткирилген. 23-октябрда бул кылмышка шектүү катары 1988-жылы туулган М.О. кармалган. Учурда тергөө амалдары жүрүп жатат.

Айрым маалыматтар боюнча, окуянын келип чыгышына студент балдардын бири аялы менен бараткан жаранды видеого тартканы себеп болгон. Ал эми кармалган жарандын мурда "мал уурулук" боюнча соттолгону жана Камчы Көлбаевдин уюшкан кылмыштуу тобунун мүчөсү экени айтылууда.