Абакта жаткан аял бир жарым жылдан кийин гана балдарын көрүүгө мүмкүнчүлүк алды

Абакта жаткан аял бир жарым жылдан кийин гана балдарын көрүүгө мүмкүнчүлүк алды. Бул тууралуу бүгүн, 3-ноябрда Жазаларды аткаруу мамлекеттик кызматынан билдиришти.

Маалыматка караганда, 34 жаштагы Б.Т. мындан бир жарым жыл мурун “адам өлтүрүүгө катышкан” деген айып менен 12 жылга эркинен ажыратылган. Анын айтуусуна караганда, күйөөсү каза болуп калган. “Соттолуучунун 5 баласы бар. Учурда төртөө балдар үйүндө, улуусу туугандарынын колунда. Анын балдарын абакка алып келгенге эч ким жок болгондуктан, 1,5 жылдан бери көрө элек болчу. Кечээ, 2-ноябрда 9 жаштагы баласын жана 5 жаштагы кызын Эл аралык Кызыл Ай комитетинин кызматкерлери абакка алып келишти. Эми ал 5-ноябрга чейин балдары менен бирге болот”, - дейт аталган мекеменин басма сөз катчысы Элеонора Сабатарова.