Кыргыз өлкөсүнө келген чет элдик жарандар катталбаса, 10 миң сом айып пул төлөшөт

Бүгүн, 4-ноябрда "Тышкы миграция жөнүндө Кыргыз Республикасынын мыйзамына өзгөртүү киргизүү тууралуу" мыйзам күчүнө кирет. Ага ылайык, Кыргыз өлкөсү менен визалык, жөнөкөйлөтүлгөн жана визасыз келишимдерди түзгөн өлкөлөрдүн жарандары милдеттүү түрдө каттоого турушу керек. Бул тууралуу Тышкы иштер министрлигинен билдиришти.

"Кыргыз мамлекети менен эл аралык келишим бар өлкөнүн жарандарына жеңилдиктер каралган. Андай келишим Орусия өлкөсү менен түзүлгөндүктөн, аталган өлкөнүн жарандары өлкөдө 30 күнгө чейин каттоосуз жүрө алышат. Ал эми мыйзам күчүнө кире электе Кыргыз жерине кирген чет элдиктер каттоодон өтүшпөйт. Каттоо өлкөдө жүргөнүнө 5 жумушчу күндөн ашкан чет өлкөлүк жарандарга милдеттүү", - деп айтылат маалыматта.

Каттоо үчүн:

- тиешелүү формадагы кат (өтүнүч кат);

- паспорт же чет элдик жарандын ким экенин, жарандыгын аныктоочу документ же анын көчүрмөсү;

- мамлекеттик бажы салыгын төлөгөндүгү тууралуу дүмүрчөк.

Каттоодон өтүү мөөнөтүн бузган чет элдик жаран административдик жоопко тартылып, мыйзамга ылайык, 10 миң сом айып пул төлөйт. Аларды каттоого алуу Калкты жана жарандык ал-абалды каттоо департаментинин аймактык бөлүмдөрүндө жүргүзүлөт.