Бишкек шаарында оңдоп-түзөөдөн өтүп жаткан жолдорго сапатсыз асфальт төшөлүүдө

Бишкек шаарында оңдоп-түзөөдөн өтүп жаткан жолдорго сапатсыз асфальт төшөлүүдө. Мындай маалыматты бүгүн, 4-ноябрда борбор калаанын айрым жашоочулары маалымат жыйынында билдиришти.

"Жолдор оңдолуп баштаганда кубанган элек, бирок көчөлөргө төшөлүп жаткан асфальттын сапаты начар болууда. Тротуарлар талапка жооп бербейт. Бишкек шаардык мэриясы аткарып жаткан иштер үчүн эч кандай долбоор жазып, тендер өткөргөн эмес. Демек, учурда салынып жаткан жолдор мыйзамсыз. Панфилов жана Токтогул көчөлөрүндө тротуар жок. Жолдордогу кемчиликтер боюнча прокуратура кызматы карабай жатат", - деди тургун Калича Умуралиева.

Ал эми дагы бир жашоочу Дина Завиженец: "Титиреп туруучу жол түздөгөн техникаларды колдонуп жатышат. Бул жакынкы үйлөргө катуу зыян келтирүүдө. Анын кубаттуулугунан үйдө илинип турган буюмдар кулап кетип жатат. Буга чейин экотехинспекция курулуштар боюнча эскертүү берген", - деди.

Айтылган кемчиликтерди Бишкек шаардык мэриясынын басма сөз кызматы четке кагууда: "Жолдордун курулушу өз тартиби менен сапаттуу жүрүүдө. Бул үчүн атайын лаборатория иштеп жатат. Документтери жок деген маалымат туура эмес. Жолдордун сапатына ишенбегендер болсо, "Бишкек асфальт-сервиске" келишсин, далилдер менен көргөзүүгө даярбыз".