Иззат Артыковго байланышкан допинг чырына чекит коюлмайынча кыргыз оор атлетчилери ири мелдештерге катыша алышпайт

Иззат Артыковго байланышкан допинг чырына чекит коюлмайынча кыргыз оор атлетчилери ири мелдештерге катыша алышпайт. Мындай чечим Жаштар иштери, дене тарбия жана спорт мамлекеттик агенттигинин 4-ноябрдагы отурумунда кабыл алынды.

Агенттиктин директору Канат Аманкулов билдиргендей, буга катар КРнын Оор атлетика федерациясынын иши тыкыр иликтенип чыкмакчы. "Акыркы 13 жыл аралыгында допингге байланышкан 8 окуя болгон. Анын баары коомчулукка белгилүү болбой, федерация өз алдынча чечип келген. Иззат Артыковго байланышкан допинг чыры бизге чоң сабак болду. Бул иш иликтенип бүткөнгө чейин оор атлетчилер ири эл аралык мелдештерге катыша алышпайт. Чечим 1-январдан тарта күчүнө кирет", - деди Канат Аманкулов.

Отурумда бул маселе каралып жатканда федерациянын өкүлдөрүнө сөз берилди. Алар ойлорун айткандан кийин оор атлетика боюнча улуттук кураманын машыктыруучусу Үсөнкан Майназаров сөз алып, кызматтан кетерин жар салды. "Мен спортчуга допинг ичирген эмесмин, спортчу дагы ичкен эмес. Бул маселе бизде допингди текшерген лабораториянын жоктугунан улам келип чыкты. Көп жылдар бою топтогон тажрыйбам мамлекетке азыр керексиз болсо, анда мен өз каалоом менен кызматтан кетем", - деди Майназаров.

Кошумчалай кетсек, оор атлет Иззат Артыков "Рио-2016" Олимпиадасында 69 килограмм салмакта коло медаль тагынган, бирок көп өтпөй анын канынан допинг табылды деген чечим чыгып, спортчу медалынан ажыратылган.