Өмүрбек Бабанов министрлер ушак сүйлөп, эркелеп кетишкенин билдирди

Парламентте депутат Өмүрбек Бабанов биринчи вице-премьер-министрликке талапкер Мухаммедкалый Абылгазиевди депутаттардын артынан ушак сүйлөбөөгө чакырды. "Өкмөт мүчөлүгүнө талапкерлердин айрымдары депутаттар андай-мындай деп ушактап жүрөт экен. Абылгазиев, сиз биринчи вице-премьер-министрликке татыктуу эмессиз. Президент өкмөттүн азыркы курамын колдоп жатат, ошого айрым министрлер эркелеп кетишти. Эркелөөчү убак бүткөн. Чек ара боюнча вице-премьерди калтырып, калгандарын жоюп салуу керек. 4 вице-премьер эмне иш кылат?" - дейт Бабанов.

Премьер-министрликке талапкер Сооронбай Жээнбеков вице-премьердин ушак сүйлөшү жакшы эместигин, эми мындай иштер болбой турганын айтты. Ал эми Абылгазиев эч кандай ушак сүйлөбөгөнүн, жетекчилер оозеки айтылып жаткан айың кептерге ишенбей, фактылар менен сүйлөөсү керектигин белгиледи.