Бишкекте муниципалдык коомдук ажатканаларды куруу иштери башталды

Бишкек шаарынын тургундарынын жана анын конокторунун ыңгайлуулугу үчүн муниципалдык коомдук ажатканалар курула баштады. Бул тууралуу бүгүн, 11-ноябрда Бишкек шаардык мэриясынын басма сөз кызматы билдирди.

"Жаштар аллеясында, Т.Сатылганов атындагы Кыргыз улуттук филармониясынын түндүк-батыш тарабында алгачкы муниципалдык коомдук ажаткана курулуп, ишке берилди. "Жашылдандыруу" ишканасынын балансына өткөрүлүп, анын иштешине бир кызматкер бекитилди. Жакынкы убакта дагы 5 коомдук ажаткана куруу пландалууда", - деп айтылат маалыматта.

Муниципалдык жеке башкармалыгынын билдиргени боюнча, үстүбүздөгү жылдын август айында жер тилке бөлүп берүүчү комиссия тарабынан 2017-жылы жеңил конструкция менен салына турган ажатканаларга тилкелер бөлүнгөн.

"Бул коомдук ажатканалар толугу менен санитардык талаптарга жооп берет жана шаардын борбор бөлүгүндө эле эмес, четине да, эл чогулган жерлерге орнотууга болот. Ажатканалар борбордук канализацияга жана суу менен камсыздоо тармагына кошулат. Ал эми ички бөлүгү заманбап жабдуулар менен жабдылат. Курулуш иштерине каражат шаардык бюджеттен бөлүнөт, учурда тартылган каражатка 4 ажаткананын курулушун баштоого болот", - деп кошумчалашкан мэриядан.