Жыл башынан бери өлкөнүн түштүк аймагында уюшкан кылмыштуу топтордун 75 мүчөсү кармалды

Ошто “унаанын айнегин талкалап, ичиндеги уюлдук телефонду жана акчаны алып кеткен” деген шек менен уюшкан кылмыштуу топтун мүчөсү кармалды. Бул тууралуу бүгүн, 16-ноябрда Ички иштер министрлигинен билдиришти.

Маалыматка караганда, окуя 2016-жылдын 9-май күнү Ош шаарынын Ленин көчөсүндө болгон.

“Бул кылмышка шектүү катары 1982-жылы туулган Ж.М. кармалган. Ал буга чейин уюшкан кылмыштуу топтун мүчөсү катары ИИМдин каттоосунда турган. Учурда кылмыш иши козголуп, тергөө амалдары жүрүп жатат”, - деп айтылат ИИМдин маалыматында.

Ошондой эле Ички иштер министрлиги жыл башынан бери өлкөнүн түштүк аймагында уюшкан кылмыштуу топтордун 75 мүчөсү кармалганын билдирди.