Чехия Республикасынын жарандарын тоноо боюнча тергөө иштери уланууда

Чехия Республикасынын жарандарын тоноо боюнча тергөө иштери уланууда. Бул тууралуу бүгүн, 16-ноябрда Ички иштер министрлигинен билдиришти.

Маалыматка караганда, окуя үстүбүздөгү жылдын 7-ноябрь күнү Бишкектеги Чүй кең көчөсү менен Кулиев көчөлөрүнүн кесилишинде болгон. Анда өздөрүн милиция кызматкерибиз деп тааныштырган 3 адам Чехия Республикасынын жарандарына таандык болгон 140 евро жана 50 долларды алып, из жашырып кетишкен.

"Бул тууралуу милиция кызматкерлерине Бактыгүл аттуу аял арыз жазган. Андан соң 38-40 жаштагы жаран келип, чет элдик атуулдардан кечирим сурап, 10 миң сом акча берген. Алар эч кимге доо-арызы жок экенин айтышып, 8-ноябрь күнү Стамбулга учуп кетишкен. Учурда иш боюнча тергөө амалдары уланууда", - деп билдиришти Ички иштер министрлигинен.