Чет элдиктерди каттоо үчүн өлкө боюнча 57 пункт иштеп жатат

Кыргыз Республикасына келген чет элдиктерди каттоо боюнча өлкөдө 57 пункт ачылган. Бул тууралуу бүгүн, 17-ноябрда Мамлекеттик каттоо кызматынын төрагасынын орун басары Камчыбек Акишев маалымат жыйынында билдирди.

"Чет элдик жарандар өлкөдө жүргөнүнө 5 жумушчу күндөн ашкандан кийин милдеттүү түрдө каттоого туруусу зарыл. Өкмөттүн токтомуна ылайык, Мамлекеттик каттоо кызматы жарандардын жана чет элдиктердин каттоосун иретке келтирүү иштерин жүргүзүүдө. Бүгүнкү күндө өлкө боюнча 57 каттоо кызматы иштеп жатат", - деп билдирди Мамлекеттик каттоо кызматынын төрагасынын орун басары Камчыбек Акишев.

Кыргыз жарандары үчүн ID-картага кошумча дагы бир карточка жасалары белгилүү болду.

"Кыргыз жарандары үчүн бүгүнкү күндө мамлекеттик чек арадан жалпы жарандык жана ID-карта менен өтүү жолдору бар. Буга чейин ID-картага кирип-чыккандыгы тууралуу штамп коюу мүмкүн эмес болчу. Мындан улам азыркы убакта карточка даярдап жатабыз. Жакынкы аралыкта маселе чечилет", - деп билдирди юстиция министринин орун басары Махамаджан Иминов.