Балыкчылыктар Темир Сариевди "Көлдүн досу жайында келет, элдин досу кышында келет" деп тосуп алышты

Бүгүн, 19-ноябрда мурунку премьер-министр, саясатчы Темир Сариев Ысык-Көл облусунда жергиликтүү тургундар менен жолугушууларды өткөрүүдө. Алгач Сариев Балыкчы шаарынын жашоочулары менен жолугушту.

Анын жүрүшүндө балыкчылыктар Темир Сариев Ысык-Көл облусуна чоң көңүл бурганын айтышты. "Облустагы магистралдык жол Советтер Союзунда салынган. Андан бери оңдоо иштери жүргөн эмес. Былтыр жол жараксыз абалга келгенде оңдолуп баштады. Балыкчылыктар үчүн ары-бери жүргөнгө жакшы болуп жатат. Сариев жетектеген өкмөткө ыраазычылык билдиребиз. Кыргызда сөз бар: "Ысык-Көлгө көлдүн досу жайында келет, элдин досу кышында келет". Суук мезгилде бизге келгениңиз үчүн чоң рахмат!" - дешти Сариевге балыкчылыктар.

Мындан тышкары алар Темир Сариевге чейинки премьер-министрлер Ысык-Көл облусунун көйгөйлөрүнө анча көңүл бурбай келгенин айтышты. "Өлкөнүн бардык аймактарында жолдор жасалып келген. Ысык-Көл облусу акыркы планга калчу. Темир Сариев "Ысык-Көл Борбор Азиядагы Мекке болсо, жолдору начар экен, жолдорду жасаш керек" деп демилге көтөргөн. Ошентип, Каракол, Балыкчы, Чолпон-Ата шаарларындагы ички жолдор салына баштаган. Ошону менен катар былтыр Балыкчыдан баштап Корумдуга чейинки жолдун курулушу боюнча бардык жоопкерчиликти моюнуна алып, президент Атамбаев менен кеңешип жолду баштаган. Тилекке каршы, жолду баштагандан кийин өзүнчө саясат болуп кетти", - дешти тургундар.