Темир Сариев: "Өкмөт Өзбекстанга түштүктөн жер берип, пансионаттарга алмаштырды деген маалымат калп"

Бүгүн, 19-ноябрда мурунку премьер-министр, саясатчы Темир Сариев Ысык-Көл облусуна барып, жергиликтүү тургундар менен жолугушууларды өткөрдү. Ал Чок-Тал айылына барганда жашоочулар Өзбекстандан кайтарылып алынган пансионаттар тууралуу сурашты. Чок-Талдын тургундарынын айтымында, "кыргыз өкмөтү Өзбекстанга түштүктөн жер берип, пансионаттарга алмаштырды" деген сөздөр тарап жаткан.

Сариев мындай маалыматты төгүндөдү. "Өзбекстандан биздин 15ке жакын объект мамлекеттик балансыбызга өткөн. Алардын ичинде насостук станциялар, суу сактагычтар жана башкалар бар. Кайтарылып алынган пансионаттарды эми туура иштетишибиз керек. Баары өзүбүздүн колубузда турат, бирок бир гана тартип жетишпей жатат", - деди Сариев.

Эскерте кетсек, ушул жылдын апрель айында Өзбекстандын Ысык-Көл облусундагы "Рохат", "Дилором", "Золотые пески" жана "Бустон" пансионаттары Кыргыз Республикасына өткөн. Кийин пансионаттардын аталыштары кыргызчаланып, "Рохат" пансионаты - "Алтын жай", "Дилором" - "Эне-Сай", "Золотые пески" "Бостери" деп аталган. Ал эми "Бустон" пансионатынын аталышы өзгөргөн эмес.