Депутат Социалдык фондго: "Пенсионер күнүнө 140 сомго жашай алабы?"

Кыргыз Республикасында пенсионерлердин эң төмөнкү тиричилик каражатынын көлөмү 4200 сом. Бул тууралуу бүгүн, 24-ноябрда Жогорку Кеңештин жыйынында депутат Экмат Байпакбаев Улуттук статистика комитетинин маалыматына таянып билдирди.

Андан соң ал Социалдык фонддун төрагасы Теңизбек Абжапаровго: "Айына 4200 сом алган пенсионер күнүнө 140 сомго жашай алабы?"- деп суроо узатты. Абжапаровдун айтымында, пенсионер 4200 сомго бир ай жашай алат, бирок оор болот. "Жыл сайын Социалдык фонд пенсиянын көлөмүн көтөрүүгө аракет кылып жатат. Быйыл пенсия жогорулатылган", - деди чиновник.

Депутаттар Социалдык фондго төмөнкү пенсияларды көтөрүүнү тапшырышты.