Ден соолугунун мүмкүнчүлүгү чектелген адамдардын саны 7 жыл аралыгында 120 миңден 173 миңге өскөн

Бишкекте 29-ноябрда Ден соолугунун мүмкүнчүлүгү чектелгендердин эл аралык күнүнө карата "Бирдей укук=Бирдей мүмкүнчүлүк" аттуу конференция өттү. Бул тууралуу Эмгек жана социалдык өнүгүү министрлигинин басма сөз кызматы кабарлады.

Министр Таалайкүл Исакунованын айтымында, ден соолугунун мүмкүнчүлүгү чектелген адамдардын саны 2008-жылдан 2015-жылга чейин 120 миңден 173 миңге өскөн.

"Бул 44 пайыздай көп. Мындай көрсөткүчтөр көңүл түшүрөт. Жыл сайын 650-700 балага шал оорусу диагнозу коюлат. Ата-энелерине жеңил болбойт. Көбүнчө андай балдар менен энеси калат, аталары мындай түйшүктү көтөрө албай, үй-бүлөдөн кетет. Энелер өмүр бою балдарын карап өтүүгө мажбур болгондуктан, жумуш тажрыйбасы жокко чыгат, камсыздоо жок, мамлекет тарабынан коргоого алынбайт. Мындай абал адамдарды балдарынан кутулууга түрткү берет", - деди Исакунова.

"Билим алуу - адамдын негизги укугу. Ар бир адам үчүн билим - башкы критерий. Өзгөчө билим мүмкүнчүлүгү чектелгендер үчүн маанилүү. Билим алса, коомчулукка аралашуусу тездеп, анын толук укуктуу мүчөсү боло алат", - дейт Ден соолугунун мүмкүнчүлүгү чектелген балдардын ата-энелеринин ассоциациясынын юристи Сейнеп Дыйканбаева.

Ошондой эле конференцияда ден соолугунун мүмкүнчүлүгү чектелгендердин жумушка орношуу маселеси да каралганы маалым болду.