"Алкан" базарынын вице-президенти: "Бастырма кулаганда жабыркагандардын бири оор абалда жандандыруу бөлүмүндө жатат"

Бүгүн, 30-ноябрда Бишкекте "Алкан" базарынын өкүлдөрү маалымат жыйынын өткөрүп, бастырма кулаган окуя боюнча айтып берип жатышат. Вице-президент Чыңгыз Алканов бардык жоопкерчиликти базар администрациясы аларын билдирди.

"Бастырмаларды 8 жыл мурун алмаштырганбыз. Албетте, учурдун талабына ылайык курулуш материалдары менен жабылган. Биз бул материалдар бардык сыноолорго туруштук берет деп ойлогонбуз. Тилекке каршы, ушундай окуя катталды. Кырсыкта жабыркагандарга дары-дармек алып берүү, алардын калыпка келүүсү, келтирилген чыгымдардын ордун толтуруу боюнча жоопкерчиликти биз алабыз", - деди ал.

Ал эми жабыркагандардын абалы боюнча Ч.Алканов буларга токтолду: "Бастырманын үстү кулаган маалда соода кылуу үчүн келген апасы жана кызы да жабыркаган. Алардын бири учурда жандандыруу бөлүмүндө оор абалда жатат. Дарыгерлер болгон аракеттерин жумшап жатышат".