Москвада 3-класста окуган баласы бар энеге мыйзамсыз миграция боюнча айып тагылып, камакка алынды

Москванын мэри Сергей Собянин Кыргыз өлкөсүнүн мигранттары көйгөйлүү экенин айтып, миграцияны жөндөө бошоңдобосун билдирген. Андан көп өтпөй, Москвадагы мигранттардын бири SUPER.KG порталына алар жашаган батирди полиция кызматкерлери текшерип, документтери жайында болгон 10 кыргызды кармап кетишкенин билдирди.

"Биз жашаган батирге полиция кызматкерлери келип, 10 кыргызды кармап кетишкен. Баарынын документтери мыйзамга ылайык болчу. Бир гана катталган дарегибиз боюнча жашабайбыз. Алардын баарын депортация кылабыз деп, акыры 9 адамды бошотуп, 3-класста окуган баласы бар Фарида деген эжени алып калышыптыр. Баласынын кан басымы жогору, учурда ооруп, энесин сагынып ыйлап жатат. Эмне кыларыбызды билбейбиз", - дейт өзүн атагысы келбеген жаран.

Жердештер камакка алынган жаранга адвокат жалдашканын кошумчалады.

"Ал батирди бир байке ижарага алып, баарыбыз ошол жакта жашап, ай сайын акчасын ага берип турчубуз. Полиция кызматкерлери батирге киришкенде, билбегендер ижарачы катары тиги эжени айтып коюшуптур. Мындан улам ал эжеге мыйзамсыз миграция боюнча айып тагылып жатат. Өзү кафеде идиш жууп иштечү", - деп кошумчалады кошунасы.

Бизге кайрылган жердештер тиешелүү кызматтагылар камактагы жаранга жардам көрсөтүшүн суранышууда.