Криштиану Роналду авиакырсыкта мерт болгон бразилиялык футболчулардын жакындарына 3 миллион евро берди

Португалиялык футболчу Криштиану Роналду Колумбиядагы авиакырсыкта көз жумган "Шапекоэнсе" клубунун футболчуларынын жакындарына акчалай жардам көрсөттү. Чет элдик маалымат булактары бөлүнгөн каражаттын суммасы 3 миллион еврону түзгөнүн маалымдашат.

Маалыматка ылайык, футболчу бул кайрымдуулук иши тууралуу азырынча ооз ача элек. Ал болгону Фейсбуктагы баракчасы аркылуу көңүл айткан. "Бул кырсык мени кайгыга салды. Клубдун көз жумган өкүлдөрүнүн жакындарына жана бул кырсыкта жан берген бардык адамдардын жакындарына көңүл айтам", - деп жазган футболчу.

Кошумчалай кетсек, Колумбияга бет алган футболчуларды алып бараткан учак кырсыкка учурап, борттогу 81 адам жабыркаган. Анын 72си жүргүнчүлөр, 9у анда кызмат кылган адамдар болчу. Учак кыйраган окуяда 6 гана адам аман калган, анын үчөө футболчулар. Бразилиялык футболдук клубдар өлкөнүн Футбол федерациясына кайрылып, "Шапекоэнсе" клубунун келечеги тууралуу сунуштарын айтышкан.