Өрт өчүрүүчү тик учак сатып алуу маселеси чечилбей жатат

Өзгөчө кырдаалдар министрлигинин Өрткө каршы күрөшүү агенттигине өрт өчүрүүчү тик учак сатып алуу маселеси чечилбей жатат. Бул тууралуу бүгүн, 1-декабрда Өзгөчө кырдаалдар министрлигинин Өрткө каршы күрөшүү агенттигинин директору Нуржан Осмоналиев билдирди.

"Буга чейин тик учак сатып алуу боюнча маселе көтөрүлгөн, бүгүнкү күндө бул иш чечилбей келет. Сатып алуу боюнча Жогорку Кеңештин депутаттарына да сунушталган, бирок каражаттын жоктугунан алынбай жатат. Ал эми Коргоо министрлиги тарабынан тик учак берилет деп айтылган эле. Алардан да дайын жок болууда", - дейт Осмоналиев.

Маалыматка ылайык, учурда Өзгөчө кырдаалдар министрлигинде бир да тик учак жок. Буга чейин алынып келинген тик учактын пайдалануу мөөнөтү бүтүп, колдонулбай жатат.

"Министрликтин карамагында турган тик учакты оңдоп-түзөөдөн өткөрөлү деп пландаганбыз. Каражат жок оңдолбой жатат. Бул учак өрт өчүрүүгө ыңгайлаштырылган эмес. Ал жөн гана жүк жеткирүү, куткаруу сыяктуу иштерде колдонулат", - деп билдирди Өзгөчө кырдаалар министрлигинин басма сөз кызматы.