Кыргыз жеринде Баңгизаттарды көзөмөлдөө кызматы жоюлду

Өкмөткө караштуу Баңгизаттарды көзөмөлдөө боюнча мамлекеттик кызмат жоюлду. Маалыматты 1-декабрда өкмөттүн маалымат кызматы таратты. Аталган кызматтын функциялары Ички иштер министрлигине, Саламаттык сактоо министрлигине, Экономикалык кылмыштарга каршы күрөшүү мамлекеттик кызматына өткөрүлүп берилет. Мекемени жоюу процедурасы аягына чыккыча кызматкерлер буга чейинки милдеттерин аткарып турушат. Бул тууралуу өкмөттүн токтому расмий жарыяланган күндөн 7 күн өткөндөн кийин күчүнө кирет.

Бул кадам Кыргыз Республикасынын Коргоо кеңешинин укук коргоо органдарын реформалоо чечиминин алкагында жасалды. Жогорку Кеңештин айрым депутаттары баңгизаттарды көзөмөлдөгөн кызматты жоюу айрым адамдардын кызыкчылыгы үчүн жасалып жатканын айтып, бул аракет бийликтин чоң катачылыгы болорун эскертишкен.