Төө-Ашууда 4 адамдын өмүрүн алган жол кырсыгы боюнча оор жүк ташуучу унаанын айдоочусу 4-январга чейин камакта калтырылды

Үстүбүздөгү жылдын 4-ноябрь күнү саат 21:15 чамасында Бишкек-Ош унаа жолундагы тоннелдин ичинде оор жүк ташуучу унаанын тормозу кармабай 3 жеңил унаа (БМВ, Хонда-Степ жана Субару) менен сүзүшкөн. БМВ үлгүсүндөгү унаанын ичинде 5 адам болгон, анын төртөө каза болуп, бирөөсү жабыркаган. Хонда-Степ унаасынын ичинде 8 адам болгон, анын ичинен 6 адам жабыркап, 2 адам жабыркаган эмес. Ошондой эле Субару үлгүсүндөгү унаанын ичиндеги 2 адамдын эч кимиси жабыркаган эмес. Чоң жүк ташуучу унаанын ичиндеги 2 жүргүнчү жеңил жаракат алган.

"Бул жол кырсыгы боюнча кылмыш иши козголуп, оор жүк ташуучу унаанын айдоочусу, 1981-жылы туулган Т.Камбаралы Жайыл райондук сотунун 7-ноябрдагы чечими менен 2017-жылдын 4-январына чейин камакка алынган. Буга айыпталуучунун жактоочусу макул болбой, Чүй облустук сотуна кассациялык арыз менен кайрылган. Облустук сот арызды 26-ноябрда карап, канааттандыруусуз калтырды", - деп билдирди Чүй облустук сотунун басма сөз кызматы.