Казакстанды Орусияга кошууга чакырык жасаган адам беш жарым жылга кесилди

Казакстанды Орусияга кошууга чакырык жасаганы жана улуттар аралык кастыкты козуткан билдирүүсү үчүн Казакстандын Игорь Чуприн аттуу жараны беш жарым жылга эркинен ажыратылды. Бул тууралуу 5-декабрда коңшу өлкөнүн ММКлары жазышты.

Сот аталган жаранды "маалыматтык-коммуникациялык түйүндөрдү пайдалануу менен атайылап улуттар аралык кастыкты козутууга аракет кылган" жана "Казакстандын бүтүндүгүн бузууну пропагандалаган" деп тапкан. Чуприн жарыялаган билдирүү социалдык тармакка жүктөлүп, 2014-жылдын 1-сентябрынан 2015-жылдын 20-майына чейин турган. Маалыматтарга таянсак, Чуприндин баракчасына негативдүү пикир калтырган интернет колдонуучуларга карата сотко чейинки териштирүү иштери жүрүп жатат.