Абакта жаткан кыз: "Темир тор артында жатып апамды сагынам, өкүнгөнүм - келечегимдин караңгы болуп турганы..."

"Кордук көргөзүп, бактыма балта чапкан адамдан өч алып, 5 жыл абакка жатууга мажбур болдум", - деп сөз баштады абакта жаткан Жээнгүл Насырбек кызы (аты-жөнү өзгөртүлдү). Ал кордук көрүп кыйналган окуясын мындайча эскерет:

"Коңшу айылда жашаган адам бир күнү кечке маал жолдон кармап алды. Аны сыртынан эле таанычумун. Ал менден 10-15 жаш улуу болчу. Айылдын четине алып барып кордук көргөздү. Интимдик катнашка мажбурлап, макул болбой койсом күчкө салып зордуктады. Эч кимге айтпаганымды билип кийин дагы эки жолу арам оюн ишке ашырды. Акыры шаарга кетип калдым. Ал убакта жаш болчумун. Эч кимге айта албай кала бергем. Ичимдеги кегимди мени зордуктагандан кийин 4 жылдан соң алдым. Бул кылыгым үчүн 5 жылга эркимден ажыратылдым".

Жээнгүл Насырбек кызы Ысык-Көл облусунун тургуну. Ал учурда 23 жашта. 8 бир туугандын алтынчысы. Бир жылдан ашуун убакыттан бери аялдар абагында өмүр кечирип келет. Ал бир туугандарын, апасын сагынганын айтты.

"Өч алганыма өкүнбөймүн. Өкүнгөнүм - эртеңки келечегимдин караңгы болуп турганы. Турмушка чыга элекмин. Айылга барсам "түрмөдөн чыккан кыз" деп сөз кылат. Башкалар сыяктуу бактылуу жашагым келет. Болочок жолдошум камалып чыкканымды билсе менден баш тартып кетеби деп чочулайм. Балалуу болсом абакка отуруп чыкканым балдарыма терс таасирин тийгизеби деп корком", - дейт каарманыбыз.

Жээнгүл абакта башкалар менен чырдашып, мушташпасын айтты. Аялдар абагында мушташ көп болбой турганын, айрым учурларда гана түшүнбөстүктөн жаңжалдашкандар болорун кошумчалады.