Жалал-Абад облусунда Сириядагы согуштук аракеттерге катышып келген адам 13 жылга эркинен ажыратылды

Жалал-Абад облусунда Сириядагы согуштук аракеттерге катышып келген адам 13 жылга эркинен ажыратылды. Бул тууралуу бүгүн, 7-декабрда Жогорку Соттун басма сөз кызматы билдирди.

Маалыматка караганда, 1983-жылы туулган Илхамжан Алимжанов "Катибати имам-Аль Бухари" аталышындагы террордук уюмдун идеяларын жактап, 2016-жылдын февраль айында Сирияга кеткен. Ал жакта өкмөттүк күчтөргө каршы күрөш жүргүзүп, Лирамон, Идлиб, Кафар Хамра жана Урум шаарларында согуштук аракеттерге катышкан.

"Жалал-Абад шаардык соту 30-сентябрь күнү "жалданмачынын куралдуу кагылышка же согуштук аракеттерге катышуусу" беренеси менен күнөөлүү деп табылып, 13 жылга эркинен ажыратылган. Буга макул болбогон айыпталуучунун жактоочусу Жалал-Абад облустук сотуна апелляциялык арыз менен кайрылган. Кийин жактоочу өз арызын кайтарып алган. Мындан улам облустук сот шаардык соттун чечимин күчүндө калтырган", - деп билдирди Жогорку Соттун басма сөз кызматы.