Орусиядагы элчилик имараттын курчоого алынганынын себебин түшүндүрдү

"Орусиянын Москва шаарындагы элчиликтин алдында митинг болот" деген маалыматтан улам ал жер курчоого алынганын окурман SUPER.KG порталына WhatsApp аркылуу бүгүн, 9-декабрда билдирген. Анда ал: "Бүгүн элчиликтин астын кашаа менен тосуп, 5 автобус ОМОН чакыргандарды кандай түшүнсө болот?! Митинг кыла турган мигрант жок ал жакта, алардын колу бошобойт", - деген эле.

Бул тууралуу Орусиядагы Кыргыз Республикасынын элчилигине кайрылганыбызда, имараттын алды атайын органдар тарабынан курчоого алынганын жана Кыргыз өлкөсүнүн жарандары келишкенин тастыкташты.

"Бүгүн элчиликке Кыргыз өлкөсүнүн жарандары келишти. Алар менен миграция, депортация, каттоо жана "кара тизме" маселелери талкууланды. Ага элчиликтин жана Мамлекеттик миграция кызматынын өкүлдөрү катышты. Бардык тийиштүү суроолорго жооп алышты. Акырында протокол түзүлүп, Жогорку Кеңешке кат жолдоо чечимине келишти", - дейт элчиликтин өкүлү Гүлбарчын Байымбетова.

Ошондой эле Гүлбарчын Байымбетова элчиликтин имаратынын курчоого алынышы боюнча буларга токтолду: "Мындан 3 күн мурун социалдык тармактарда "Кыргыз балдар, келгиле, метродо чогулуп, элчиликке барабыз" деген жарыя жайгаштырылган экен. Аны 85 миң киши окуптур. Орусиянын органдары тийиштүү реакция жасап келишти. Эч кандай кармоо болгон жок. Алар байкап, өз иштерин аткарышты".