Алдын ала жыйынтык: Конституцияны өзгөртүүгө шайлоочулардын 80 пайызы "макул" деп добуш берди

Бүгүн, 11-декабрда саат 20:00дө Кыргыз Республикасында жергиликтүү кеңештерди шайлоо жана Конституцияны өзгөртүү боюнча референдум аяктады. Бардык шайлоо тилкелери жабылып, учурда добуштарды эсептөө иштери жүрүүдө.

22:00. Бул убакытка карата Конституцияны өзгөртүү боюнча референдумда берилген 1 199 941 добуш эсептелинип чыкты. Бул жалпы катталган шайлоочулардын 42 пайызын түзөт. БШКнын алдын ала маалыматы боюнча, добуш бергендердин 80 пайызы Баш мыйзамды өзгөртүүгө макулдугун билдиришти, 16 пайызы "каршы" деп добуш беришти. Колдонулган бюллетендердин 4 пайызы "жараксыз" деп таанылды.

21:45. Бул убакытка карата Конституцияны өзгөртүү боюнча референдумда 942 831 шайлоочу "макул", 182 226 шайлоочу "каршы" деп добуш бергени белгилүү болду. 59 462 бюллетень "жараксыз" деп таанылды.

21:00. Бул убакытка карата Конституцияны өзгөртүү боюнча референдумда 882 054 шайлоочу "макул", 170 269 шайлоочу "каршы" деп добуш бергени белгилүү болду. 55 685 бюллетень "жараксыз" деп таанылды.

20:40. Бул убакытка карата Конституцияны өзгөртүү боюнча референдумда 822 360 шайлоочу "макул", 157 147 шайлоочу "каршы" деп добуш бергени белгилүү болду. 51 739 бюллетень "жараксыз" деп таанылды.

20:30. Алдын ала маалыматтар боюнча, Конституцияны өзгөртүү боюнча референдумда 807 366 шайлоочу "макул", 154 608 шайлоочу "каршы" деп добуш берди. "Жараксыз" деп 50 783 бюллетень таанылды. Референдумда берилген добуштар шайлоо тилкелеринен улам-улам борбордук серверге түшүүдө. Бул тууралуу Борбордук шайлоо комиссиясынын төрайымы Нуржан Шайлдабекова билдирди.

20:20. Саат 18:00гө карата Конституцияны өзгөртүү боюнча референдумга шайлоочулардын 35,5 пайызы катышты.

20:15. Жергиликтүү кеңештерди шайлоого жана референдумга 180ден ашуун байкоочу көз салды. Бул тууралуу маалымат жыйынында Борбордук шайлоо комиссиясынын төрайымы Нуржан Шайлдабекова билдирди. Анын айтымында, алардын баары шайлоо жана референдум мыйзамдын негизинде өтүп жатканын айтышып, жогорку бааны беришти.

18:24. Саат 17:00гө карата шаардык кеңештерге шайлоодо республика боюнча 587 619 шайлоочудан 180 747си (30,76 пайыз) добуш берди, айылдык кеңештерге шайлоодо 1 701 032 шайлоочудан 550 645и (32,37 пайыз) катышты. Бул тууралуу маалымат жыйынында Борбордук шайлоо комиссиясынын төрайымы Нуржан Шайлдабекова билдирди.

18:15. Саат 17:00гө карата Конституцияны өзгөртүү боюнча референдумга 2 851 952 шайлоочудан 867 141и (30,41 пайыз) катышты. Бул тууралуу бүгүн, 11-декабрда маалымат жыйынында Борбордук шайлоо комиссиясынын төрайымы Нуржан Шайлдабекова билдирди. Анын айтымында, мыйзамга ылайык, шайлоочулардын 30 пайызынан көбү добуш бергенде референдум өттү деп табылат.

17:30. Саат 16:00гө карата Баткен облусунда жергиликтүү кеңештин депутаттарын шайлоого шайлоочулардын 28 пайызы, ал эми референдумга 29 пайызы добуш берди. Маалыматты облустук администрация билдирди.

14:10. Жергиликтүү кеңешке шайлоодо Нарын облусу эң активдүү болууда. Бул тууралуу бүгүн, 11-декабрда маалымат жыйынында Борбордук шайлоо комиссиясынын төрайымы Нуржан Шайлдабекова билдирди.

Анын айтымында, саат 13:00гө карата республика боюнча айылдык кеңештерди шайлоого 85 650 шайлоочу (14,58 пайыз) катышты, ал эми шаардык кеңештерди шайлоого 232 292 шайлоочу (13,66 пайыз) катышты.

14:00. Саат 13:00 карата Конституцияны өзгөртүү боюнча референдумга 2 851 952 шайлоочудан 393 356сы (13,79 пайыз) катышты. Бул тууралуу бүгүн, 11-декабрда маалымат жыйынында Борбордук шайлоо комиссиясынын төрайымы Нуржан Шайлдабекова билдирди. Анын айтымында, түштөн кийин жана кечке жуук шайлоочулардын активдүүлүгү күтүлүүдө.

13:50. Жергиликтүү кеңештерге шайлоо жана референдум жогорку деңгээлде өтүп жатат. Бул тууралуу бүгүн, 11-декабрда маалымат жыйынында Орусиянын Мамлекеттик Думасынан байкоочу Татьяна Алексеева билдирди.
Анын айтымында, орусиялык делегация бир нече шайлоо тилкелерине барып келди. “Эч кандай кемчилик байкаган жокпуз. Борбордук шайлоо комиссиясынын мыкты даярданганы көрүнүп турат. Шайлоочулар жакшы маанай менен участкаларга келишүүдө”, - деди Алексеева.

13:42. Шайлоочулардын добушун сатып алуу боюнча 5 факт катталды. Бул тууралуу маалымат жыйынында ички иштер министринин орун басары Алмаз Орозалиев билдирди.

13:36. Мурунку премьер-министр Темир Сариев №1045-шайлоо тилкесинен добуш берди.

13:30. "Ата Мекен" партиясынын лидери Өмүрбек Текебаев добуш бере турган шайлоо тилкесинде да бюллетенди текшерүүчү электрондук аппараттар иштебей калды. Депутат кийинчерээк добуш бере турганын билдирди.

13:20. Бишкектеги №1260-шайлоо тилкесинде "Республика-Ата Журт" фракциясынын лидери Өмүрбек Бабанов добуш берди.

13:10. Айрым эксперттер шайлоодо студенттерди жеке кызыкчылыктарга пайдалануу жүрүп жатканын айтышууда. Рита Карасартова "№-1163-шайлоо тилкесинде добуш берген студенттер унаада отурган кимдир бирөөгө отчёт беришүүдө" деп жазып, социалдык тармактагы жеке баракчасына видео жүктөдү.

12:12. Премьер-министр Сооронбай Жээнбеков Бишкек шаарындагы №1266-шайлоо тилкесинен добуш берди. Өкмөт жетекчиси Ош облусунун Кара-Кулжа районунда каттоодо турары, тийиштүү документтин негизинде Бишкектен добуш берүү укугуна ээ болгону айтылды.

11:29. Пригородное айыл аймагындагы №7159-шайлоо тилкесинде добуштарды автоматтык текшерүүчү жабдуу бузулуп, шайлоочулар бюллетенди дароо урнага салышууда. Бул тууралуу SUPER.KG порталына айылдык кеңештин депутаттыгына талапкер Бибигүл Бубебаева билдирди. "Эл бюллетенди аппараттан өткөрбөй түз эле урнага салып жатат. Кийин кантип эсептешет, шайлоо өткөнүн же өтпөгөнүн кантип таанышат, билбейм", - дейт талапкер.

11:20. Алмазбек Атамбаев: "Референдумга эң аз дегенде шайлоочулардын 30 пайызы келсе экен деп үмүттөнүп жатам. Эсиңиздерде болсо, мурунку бийликтердин тушунда 110 пайыз болуп кетчү, анткени шайлоолор таза өтчү эмес. Учурда мындай иштерге жол берилбейт. Элибиз шайлоолор таза өтөрүнө ишене баштады".

11:00. Президент Алмазбек Атамбаев Бишкектеги №5-кесиптик лицейде добуш берди.

10:45. №1001-шайлоо тилкесинен добуш берүүчү 480 жарандын 14ү азыркы учурда добушун берди. Аймактык шайлоо комиссиясынын төрагасы Турусалы Супатаевдин айтымында, шайлоочулардын көбү түшкө жакын көбөйөт. Аймактык шайлоо комиссияларынын башчылары азыркы учурда добуш бергендердин аз болушу шайлоочулардын пассивдүүлүгү эмес экенин айтышууда. Бардык эле шайлоолордо элдин келиши түшкө жакын күчөйт.

10:20. Бишкек шаарындагы №1005-шайлоо тилкесинде 56 шайлоочу добуш берди. Бул жерде референдумга 1136 шайлоочу добуш берет. Ал эми Бишкек шаардык кеңешинин депутаттарын шайлоого добуш берүүчүлөрдүн саны 1086.

10:08. Жогорку Кеңештин төрагасы Чыныбай Турсунбеков Бишкектеги №5-кесиптик лицейде добуш берди.

9:30. Сокулук районуна караштуу Новопавловка айыл аймагындагы №7230-шайлоо тилкесине саат 9:30га карата 10 шайлоочу келип добуш берди. Аймактык шайлоо комиссиясынын төрайымы Фарида Исманкулованын маалыматы боюнча, мында добуш берүүчүлөрдүн саны 1896. Добуш берүүчүлөрдүн басымдуу бөлүгү саат 10:00дөн 13:00гө чейин келерин айткан төрайым: "Азырынча баары жакшы, эч кандай мыйзам бузуулар жок. Байкоочулар көз салып отурушат", - деди.

8:10. Мамлекеттик каттоо кызматынын төрагасы Тайырбек Сарпашевдин айтымында, кечээ, 10-декабрда имараттан тышкары шайлоо өткөрүлүп, анда ден соолугунун мүмкүнчүлүгү чектелген жана ооруканада жаткан 11 миңден ашуун жаран добуш берди. "Бүгүнкү күндө республика боюнча 500 адис жана 9 миң оператор иштеп жатат. Мындан тышкары 3 миңге жакын сурап-билүү борбору бар", - деди Сарпашев.

8:00. Бишкектеги 1043-шайлоо аймагында (13-орто мектеби) Мамлекеттик каттоо кызматынын төрагасы Тайырбек Сарпашев биринчилерден болуп келип добуш берүүдө. Иш-чара мамлекеттик гимнди жаңыртуу менен башталды. Бул шайлоо аймагында байкоочулар шайлоо процессин көзөмөлдөөдө.