Балбан Эламан Догдурбек уулу Венгриядагы Дүйнө чемпиондугунда коло медаль тагынды

10-декабрда Венгрияда күрөш боюнча Дүйнө чемпиондугу старт алды. Анда "Рио-2016" Олимпиадасынын программасына кирбей калган 6 олимпиадалык эмес салмакта жеңүүчүлөр аныкталууда. Мелдеш алкагында кыргыз балбаны Эламан Догдурбек уулу эркин күрөш боюнча 70 килограмм салмакта килемге чыгып, коло медаль тагынды.

Ал алгач казак балбаны Нурлан Бекжанов менен беттешип, 1:5 эсебинде утулууга мажбур болду. Атаандашынын финалга чыкканы Догдурбек уулуна коло медаль үчүн күрөшүү укугун берди. Жыйынтыгында ал коло медалга карай бет алып, алгач венгриялык Цомбор Истван Гуляшты утту (5:4). Кийинки кармашта молдовалык Михаил Саваны 8:2 эсебинде утту.

Ал эми 3-орун үчүн чечүүчү кармашта балбаныбыз япониялык Набуеси Такожима менен беттешип, 11:0 эсебинде утуп алды.