Патрулдук милиция: "Токтогул көчөсүнө такталарды уруксатсыз илген активисттерди сотко берсе болот"

Бүгүн, 14-декабрда Кыргыз өлкөсүнүн экс-президенти Роза Отунбаеванын уулу Атай Садыбакасов Бишкектеги Токтогул көчөсүнө Нью-Йорк шаарындагыдай такталарды илгенин жазып чыкканын маалымдаган элек. Бул идея тууралуу мэрия түштөн кийин комментарий берерин айткан. Сыягы, аны калтыруу же алып салуу боюнча чечим түшкө чейин күттүрдү. Жыйынтыгында мэрия чечимди Ички иштер министрлигинин Жол кыймылынын коопсуздугу боюнча башкармалыгы чыгарарын айтты.

Ал эми Бишкек ШИИББинин Патрулдук милиция башкармалыгынын басма сөз катчысы Таалай Бугубаев жогорудагы демилге жөнүндө буларды билдирди:

"Көчөлөрдөгү такталар боюнча биз эмес, "Бишкек асфальт-сервис" ишканасы жооп берет. Биз жолду көзөмөлдөөчү белгилерге гана жооп беребиз.

Негизи, жол кыймылына тиешеси жок түрдүү белгилерди орнотууга уруксат берилбейт. Анда багыт берүүчү белгилер илиниши мүмкүн. Ал эми көчөнүн аттары тамдын бооруна гана жазылат.

Активист жигиттер "Бишкек асфальт-сервистен" уруксат сурашса болмок. Кандай белгилер коюлушу керектигин ошол ишкана көзөмөлдөйт, андыктан ишкана белгилерди илген адамдарды сотко берсе болот. Көпчүлүгү "бул белгилер айдоочуну алаксытат" деген ойлорун айтып жатышат. Мисалы, башка бирөөлөр деле 50 метрден кийин клуб же дагы башка нерсе бар деп жазып, илип коюшу мүмкүн да. Ошол үчүн жол белгилери катуу көзөмөлдөнөт".