Бишкекте 3 жаран жасалма доллар менен кармалды

2016-жылдын 5-декабрь күнү Бишкек шаардык ички иштер башкы башкармалыгына 1971-жылы туулган А.Р. аттуу жаран арыз менен кайрылган. Анда ал 24-ноябрь күнү үйүнүн жанынан белгисиз жаран "Айфон 7" үлгүсүндөгү уюлдук телефонун сатып алып, ал үчүн 900 жасалма доллар берип койгонун айткан.

Бул факт каттоого алынып, кылмыш иши козголгон. Жүргүзүлгөн ыкчам издөө иштеринин негизинде кылмышка шектүү катары 1990-жылы туулган К.А. кармалган. Анын айтуусуна караганда, мурда эки жолу соттолгон. Сурак учурунда ал жасалма 3000 долларды Ражап аттуу таанышынан алганын жана сатуудан түшкөн акчанын 40 пайызын ага бере турганын айткан.

Тергөөнүн жүрүшүндө төмөндөгүлөр белгилүү болгон: 24-ноябрь күнү Бишкектеги соода борборлорунун биринен сим-карта сатып алып "Айфон 7" үлгүсүндөгү уюлдук телефон сатам" деген жарыяга чалган. Белгиленген жерге барып, жабырлануучудан телефонду алып, ага жасалма 900 доллар берген. Кийин ал телефонду Ражапка алып келген.

Иликтөө иштеринин натыйжасында кылмышка шектүү катары 1995-жылы туулган Н.Р. кармалган. Анын жанынан 14 300 жасалма доллар табылган. Шектүү бул акчаларды Рамазан аттуу таанышынан алганын айткан. Мындан улам кылмышка шектүүлөрдүн дагы бири 1993-жылы туулган А.Р. колго түшкөн. Учурда үчөө тең убактылуу кармоочу жайга киргизилип, тергөө амалдары жүрүүдө.