Журналисттин Алепподогу үрөй учурган селфиси коомчулукту кыжырдантты (нерви жукаларга сунушталбайт)

Кечээ, 15-декабрда Сириянын Алеппо шаары жоочулардан бошотулганын дүйнөлүк маалымат каражаттары жазып чыгышты.

Орусиялык ММКлар операциянын жүрүшүндө 100 миң жергиликтүү тургун бошотулганын, алардын жарымы кичинекей балдар экенин жазышкан. Орусия Федерациясынын Куралдуу күчтөрүнүн башкармалыгынын башчысы Виктор Познихирдин айтымында, миңдеген жоочулар өз ыктыяры менен Алепподон чыгып кетишкен, алардын жарымынан көбүнүн күнөөлөрү кечирилген. 900дөй жоочу, ондогон аскер техникасы жок кылынган.

1000ден ашуун террорчу 20 автобус, 10 "Тез жардам" кызматынын унаалары менен Алепподон Сириянын Идлиб шаарына чыгарылганы БУУнун Сирия боюнча атайын өкүлү Стаффан де Мистураны бушайман кылууда. Анын ою боюнча, Идлиб шаарын да Алеппонун тагдыры күтүп турушу мүмкүн.

Ал эми батыш ММКлары Алеппону бошоткон аскерлер бул операциянын жүрүшүндө жергиликтүү тургундардын айрымдарын мыкаачылык менен өлтүрүшкөнүн жазышууда. Мындан улам Европанын кээ бир шаарларында тургундар нааразычылык билдирип, Париждеги Эйфель мунарасы өчүрүлгөн.

Ошол эле маалда араб ММКлары Сириянын Мамлекеттик маалымат агенттигинин журналисти Сильви Кенана Аллуштун кылыгын катуу сындап жызышты. Анын өлүктөрдүн фонунда түшкөн селфи сүрөтү интернетке жайылып, социалдык тармактын колдонуучуларын кыжырдантты.

"Мындай сүрөттү журналист биринчи ирет жарыялап жаткан жок. Ал сириялыктар менен арабдардын сезимдери аркылуу чагымчылык кылууда", - деп жазышкан араб ММКлары.

Ал эми журналист өзүнүн сүрөтүндөгү каза болгондор Алепподогу, Сириянын башкаруучу администрациясына кол салган жоочулар экенин жазган.