Барак Обама: "Президенттик шайлоого кийлигишкен Орусияга чара көрөбүз"

АКШнын президенти Барак Обама президенттик шайлоого кийлигишкени үчүн Орусияга карата чара көрөрүн NPR радиосуна билдиргенин "РИА Новости" басылмасы жазып чыкты.

"Менин оюмча, башка өлкөнүн бийлиги биздин шайлоонун калыстыгына таасирин тийгизип жатса, сөзсүз чара көрүү керек жана биз чара колдонобуз", - деген Обама АКШ өз ыңгайы келген учурда жооп кайтарарын билдирген.

"Анын кээ бирин ачыктаганга мүмкүн болсо, айрымдары ачыкталбайт. Путин менин оюмду жакшы билет, анткени мен аны менен бул тууралуу ачык сүйлөшкөм", - деп кошумчалаган президент.

Октябрь айында АКШнын чалгындоо уюму шайлоо системдерине болгон кибер чабуулдардын артында орусиялык хакерлер турганын жарыялаган. Кийинчерээк Борбордук чалгындоо башкармалыгы Москваны Дональд Трампты жеңишке жеткирүү үчүн Демократиялык партиянын серверлерин бузуп киргенине айыптаган.

Ал эми Дональд Трамп Орусиянын кийлигишүүсү тууралуу маалыматтар күлкүлүү экенин айтса, Владимир Путиндин басма сөз катчысы Дмитрий Песков Москвага коюлган айыпты далилсиз деп атаган.