Жолдошбек Көлбаев Улуттук дзюдо федерациясынын президенти болуп шайланды

Бүгүн, 17-декабрда Бишкекте Улуттук дзюдо федерациясынын жыл жыйынтыгын чыгарган иш-чарасы орун алды. Бул күнү федерация акыркы 3 жылда аткарылган иштер боюнча отчёт берди. Ошондой эле федерациянын жаңы президентин шайлоо жана жыл мыктыларын сыйлоо пландалган.

Федерацияны буга чейин жетектеп келген Ырысбек Мааткабылов кызмат ордун бошотуп берди. Ал акыркы 3 жылдагы эң негизги максаттардын башында "Рио-де-Жанейро-2016" Олимпиадасында медаль алуу болгонун белгиледи. "Биз бул максатыбызга жете алган жокпуз. Алдыда аткарыла турган көп жумуш бар", - деди ал.

Президенттик кызматка шайлана турган бир гана кандидат болду: ал Көлбаев Жолдошбек Асанбекович. Федерациянын мүчөлөрү добуш берүүдө анын талапкерлигин бир добуштан колдоп беришти.