Таш-Көмүрдө шахтадагы кырсыктан 2 адам каза болду, 2 адам аман калды (хронология)

Жалал-Абад облусунун Таш-Көмүр шаарындагы көмүр шахтасында уранды алдында калган 4 адамдын экөөсүнүн жансыз денелери табылып, экөө куткарылды. Бул тууралуу бүгүн, 17-декабрда Өзгөчө кырдаалдар министрлигинен билдиришти.

Маалыматка ылайык, 16-декабрда саат 12:00 чамасында "Северная" шахтасында кырсык катталып, 4 адамды басып калганы тууралуу маалымат келип түшкөн.

12:05. 2-Өзүнчө издөө куткаруу отрядынан полковник А.Булановдун жетекчилигинде 20 куткаруучу кырсык болгон жерге жөнөп кеткен.

12:30. Уранды алдында калгандарды издөө иштери башталган.

12:39. Тоо-кен кырсыгынан куткаруу кызматынын Таш-Көмүр шаарында жайгашкан бөлүмдүн куткаруучу капитаны Н.Атамбековдун жетекчилигинде 6 куткаруучу жөнөп кеткен.

13:00. Жалпы 27 куткаруучу издөө иштерин биргеликте уланткан.

14:10. Таш-Көмүр шаарынын тургуну 1978-жылы туулган К.Д. куткарылып, биринчи медициналык жардам көрсөтүлүп, "Тез жардам" кызматкерлерине өткөрүлүп берилген.

15:30. Эки адамдын жансыз денелери табылган. Алар: Таш-Көмүр шаарынын тургуну 1978-жылы туулган Ч.Б. жана Аксы районунун Райкомол айылынын тургуну У.Н.

15:45. 2-Өзүнчө издөө куткаруу бөлүгү жансыз денелерди Таш-Көмүр шаардык ооруканасынын сөөктөрдү кармоочу жайына жеткирип берген.

23:10. 1987-жылы туулган Аксы районунун Райкомол айылынын тургуну Б.Д. куткарылып, ооруканага жеткирилген. Ал 11 саат уранды алдында жатып, аман калган.