Мамлекеттик айыптоочу: "Азимжан Аскаровдун күнөөсү толук далилденген"

Бүгүн, 20-декабрда Чүй облустук соту Азимжан Аскаровдун ишин карап жатат. Анда мамлекеттик айыптоочу жарыш сөзгө чыгып, төмөндөгүлөргө токтолду: “Азимжан Аскаровдун иши жаңы ачылган жагдайлар боюнча 2,5 айдан ашык каралды. Анда бир катар күбөлөр, айыпталуучу жана жабырлануучу тарап суралды. Биз сот акыйкат өтсүн деп, бир да ишке аралашкан жокпуз. Териштирүүлөрдүн негизинде Азимжан Аскаровдун күнөөсү толук далилденген. Мындан улам Базар-Коргон райондук сотунун 2010-жылдын 15-сентябрында чыккан чечимин күчүндө калтырууну суранабыз”.

Кийинки сот отуруму 2017-жылдын 10-январына белгиленди.

Эскерте кетсек, Азимжан Аскаровду 2011-жылы Кыргыз Республикасынын Жогорку Соту күнөөлүү деп таап, өмүр бою эркинен ажыраткан. Бул чечимге макул болбогон Азимжан Аскаров БУУнун Адам укуктары боюнча комитетине кайрылган. Ал комитеттин үстүбүздөгү жылдын 20-апрелинде чыгарган чечимине ылайык, Аскаровду абактан бошотуп, соттун өкүмүн жокко чыгаруу каралган. Мындан улам жаңы ачылган жагдайларга байланыштуу иш Жогорку Сотто кайрадан каралып, Жалал-Абад облустук сотунун 2010-жылдын 10-ноябрындагы өкүмү жана Жогорку Соттун 2011-жылдын 20-декабрындагы токтому жокко чыгарылган. Ошондой эле жазык ишти апелляциялык тартипте кароо үчүн Чүй облустук сотуна жиберүү чечими кабыл алынган.