Ош шаардык жылуулук ишканасы: "Жашоочулар жылуулукка берилген сууну пайдаланып жатышат"

Ош шаарында жашоочулар жылуулук берилүүчү суу түтүгүнөн суу алып жатышканын бүгүн, 20-декабрда SUPER.KG порталына Ош шаардык жылуулук менен камсыздоо муниципалдык ишканасынын директору Беделбай Кадырбердиев билдирди.

"Суунун 1 кубун "Ош шаардык суу-канал" муниципалдык ишканасынан 10 сом 14 тыйындан сатып алабыз. Жашоочулар жылуулук менен берилген суудан күнүмдүк тиричиликтерине колдонуп жатышат. Мындан улам биз бир күндө 40 тоннадан ашык суу жоготуп жатабыз. Кулатов шаарчасындагы көп кабаттуу үйлөрдүн жашоочулары жылуулук түтүктөрүнө кошумча түтүк улап алышкан. 268 көп кабаттуу үйдүн 50 пайыз жашоочулары сууну мыйзамсыз пайдаланып келишет", - деп билдирди Кадырбердиев.

Беделбай Кадырбердиевдин маалыматына ылайык, жоготууга учураган сууну калыбына келтирүүдө электр энергияга жана отунга кеткен чыгым эки эсе көбөйгөн. Мындан улам аталган кызмат рейд жүргүзгөн. Жыйынтыгында 247 кошумча уланган түтүк кыркылган. Жылуулук ишканасы жашоочулардын мындай аракети үчүн 20 миң сомдон жогору айып салынарын эскертет.