Ибрагим Жунусов: "Орусия элчисинин өлтүрүлүшү боюнча көрсөтмө берүүгө даярмын"

Кыргыз Республикасынын Түркиядагы элчиси Ибрагим Жунусов Орусиянын элчиси Андрей Карловдун өлтүрүлүшү боюнча көрсөтмө берүүгө даяр экенин бүгүн, 20-декабрда "Россия-24" телеканалына берген маегинде айтты.

Ошондой эле ал кылмышкер Мевлют Мерт Алтынташты Карловдун жан сакчысы деп ойлогонун айткан.

"Биз анын төшүндөгү күзөт кызматынын белгисин көрүп элчинин жан сакчысы деп ойлогонбуз. Ал бир алыстап, бир жакындап жаткан, ага көп деле көңүл бурган эмеспиз. Карлов сүйлөп баштаган соң, болжол менен 2 мүнөттөн кийин атылды. Бизге "жерден турбагыла, кыймылдабагыла" деди. Карлов бизден 3-4 метр алыстыкта жатты. Кылмышкердин огу түгөнүп, куралын октомой болгондо, 25тей адам бөлмөдөн качып чыкканга үлгүрдүк", - деди Жунусов.

Өзүнүн маегинде Ибрагим Жунусов Андрей Карлов жана дагы башка элчилер тыгыз байланышта болуп, майрамдарды бирге өткөрүп жүрүшкөнүн жана орусиялык элчи өзүнүн ишин мыкты билген кызматкер болгонун айтып, жубайынын көзүнчө өлтүрүлгөнүн кошумчалады.

"Ал баарынан жубайынын абалына сарсанаа болуп жүргөн, себеби жубайына операция жасалган. Ошол кечеде жубайы дагы бар болчу. Орусия менен Түркиянын кызматташтыгы биринчи кезекте Карловдун аракети менен жакшырды", - деген кыргыз элчиси.