Депутаттар тоолуу аймактардын тургундарынын добуштары менен Жогорку Кеңешке келишкенин эстешти

Тоолуу аймактарда электр энергиясына байланыштуу көйгөйлөрдү чечиш керек. Мындай пикири менен бүгүн, 22-декабрда Жогорку Кеңештин жыйынында депутат Камчыбек Жолдошбаев өкмөткө кайрылуу жасады.

Анын айтымында, мамлекеттик телеканалдар аба ырайы тууралуу ар түрдүү маалыматты берип жатышат. "Бишкекте 0° градус болгондо, баары сасык тумоо менен ооруп калышкан. Тоолуу райондордо -25° градус суук болуп жатат. Үшүп жаткандарды анда Бишкекке алып келели. Бул аймактардын тургундары бизди шайлашкан. Биз алардын ишенимин актап, жардам көрсөтүшүбүз керек", - деди Жолдошбаев.

Мындан тышкары ал Ат-Башыда катуу сууктан унаалар жүрбөй жатканын баса белгиледи. "Жолдор тайгак болуп, унаалар кырсыкка кабылышууда. Аймакта асфальт төшөлгөн, бирок кардан тазаланбай жатат", - деди депутат.