Энергохолдинг: "Жаңы жыл майрамында жарык өчпөйт"

Жаңы жылды тосууда Кыргыз Республикасында жарык өчпөйт. Бул тууралуу бүгүн, 22-декабрда Жогорку Кеңештин жыйынында Улуттук энергетикалык холдинг компаниясынын төрагасы Айбек Калиев билдирди.

Анын айтымында, Токтогул ГЭСиндеги кабелдерди иштетүү мөөнөтү 25 жыл, бирок аларды иштеткенине 42 жыл болду. "Кабелдердин эскилиги жеткен. Мындан улам жаңы 4 кабель сатылып алынган. Учурда алар Түштүк Кореяда. Бул кабелдерди алып келүү жана сактоо маселе болуп жатат. 2017-жылдын апрелине чейин жеткирилмекчи, 15-июнга чейин бардык кабелдер алмаштырылат", - деди Калиев.

Мындан тышкары учурда эч кандай чектөөлөр болбой жатканын жана Токтогул ГЭСинде кызматкерлер штаттык режимде иштеп жатканын баса белгиледи. "Азыркы тапта Орусиядан келген 3 адис иштеп жатат, дагы 2 адистин келери күтүлүүдө", - деп кошумчалады Калиев.

Эскерте кетсек, Токтогул ГЭСинде үстүбүздөгү жылдын 15-декабрында Токтогул ГЭСинде кубаттуулугу 300 мегаваттык №2-гидроагрегат анын көмөкчү жабдуусунун жабыркашынан улам пландан тышкары өчүрүлгөн.