Кара-Кулжа районунда кекиликке мыйзамсыз аңчылык кылган 3 адамдын бири милиция кызматкери экендиги белгилүү болду

Ош облусундагы Кара-Кулжа районунун 1-Май айыл аймагында мыйзамсыз кекилик аткан 3 адам кармалды. Бул тууралуу бүгүн, 23-декабрда Экологиялык коопсуздук боюнча инспекциянын басма сөз кызматынан билдиришти.

"Мергенчилик кылууга уруксат кагаздары жок ууга чыккан 3 адам кармалды. Алардын жанынан 3 даана ок атуучу курал, 18 баш кекилик табылды. Мыйзамсыз иш жасаган жарандардын куралдары жана атылган кекиликтер алынды. Аңчылык кылгандардын бири милициянын ардагери болгон", - деп билдирди басма сөз кызматы.

Маалыматка ылайык, кармалган аңчыларга протокол толтурулуп, алынган мылтыктары Ички иштер бөлүмүнө өткөрүлүп берилген. Учурда жаратылышка келтирген зыяндын ордун толтуруу максатында чыгашаны өндүрүү аракети көрүлүүдө.