Бишкекте "Ош базарында" кармалган 9 уйдун эти лабораторияга жиберилди

Бишкекте "Ош базарында" 9 уйдун эти жүктөлгөн унаа кармалды. Бул тууралуу бүгүн, 23-декабрда Ветеринардык жана фитосанитардык коопсуздук боюнча инспекциянын басма сөз кызматынан билдиришти.

"Ветеринардык жана фитосанитардык коопсуздук боюнча инспекция атайын рейд жүргүзгөн. Рейддин алкагында "Ош базардан" 9 уйдун эти жүктөлгөн унаа кармалды. Жүктөлгөн эттер түшүрүлүп, атайын лабораторияга жөнөтүлдү. Азырынча эттердин сапаты боюнча жыйынтык чыга элек", - деп билдирди басма сөз кызматы.

Маалыматка ылайык, уйдун эттери Каракол шаарынан алынып келинген. Жергиликтүү мал доктурлар жүктөлгөн эттерге тиешелүү документтерди берген.

Эске салсак, буга чейин жарандык активисттер "Ош базарында" өлгөн малдын эти сатылып жатат деп айтып чыккан. Ал эми Бишкек шаардык мэрия рейд жүргүзүп, өлгөн малдын эти "Ош базардан" табылбагандыгын маалымдаган.