Депутат: "Мен гамбургер жебейм"

"Мен гамбургер жебейм", - деди бүгүн, 23-декабрда журналисттер менен жолугушуусунда Жогорку Кеңештин депутаты Узарбек Жылкыбаев.

"Бүгүнкү күндө эт маселеси кызуу талкууланып жатат. Эл аралык талаптарга ылайык, эт тоңдурулган түрдө сатылышы керек. Биз болсо жаңы союлган малдын этин сатып алабыз. Эт сатуучулардын моралдык жоопкерчилиги болуш керек. Арам эттер сатылбаш керек. Бишкекте гамбургер жасап саткан 3-4 компания бар. Алар тууралуу терс маалыматтар чыгып жатат. Бул атайын жасалган антиреклама болушу мүмкүн. Өзүм гамбургер жебейм, жаштар бул продукцияны жакшы көрүшөт", - деди Жылкыбаев.

Айта кетсек, буга чейин жарандык активисттер "Ош базарында" өлгөн малдын эти сатылып жатканы тууралуу айтып чыгышкан. Ал эми Бишкек шаардык мэриясы рейд жүргүзүп, өлгөн малдын эти "Ош базардан" табылбагандыгын маалымдаган. Бул жагдайды териштирүү үчүн парламенттин тармактык комитетине тапшырма берүүнү өтүнгөн. Депутат Дастан Бекешев текшерүү "Ош базары" менен эле чектелбей, бардык базарларды көзөмөлдөө керектигин айткан.