Ту-154 учагынын кырсыкка учурашынын себептери аныкталууда. Терроризмдин белгилери жок

25-декабрда Орусиянын Сочи шаарынан Сирияга багыт алган Ту-154 учагынын кырсыкка кабылып, Кара деңизге кулап түшүүсү боюнча иликтөөлөр уланууда. Учактын кулап түшүү себептерин терактка байланыштыруу негизсиз. Бул тууралуу Орусиянын Транспорт министрлигинин башчысы Максим Соколов "Интерфакс" басылмасына билдирди.

"Орусиянын башка аймактарындагы аэропорттордо терроризмге каршы чара көрүүнү күчөтүүнүн кажети жок. Кырсыктын жаралышына учактын техникалык абалы же пилоттук курамдын кетирген катачылыктары себеп болушу мүмкүн. Муну атайын иликтей турган комитет аягына чыгарат", - дейт министр.

Кырсык болгон жерден табылган сөөктөрдү жүктөп, 1-учак Москваны көздөй учту. Ал жакта сөөктөрдү таануу үчүн Орусиянын Коргоо министрлигинин алдындагы Соттук-медициналык эксперттердин бюросу жана соттук-криминалдык эксперттер иш алып барышмакчы. Акыркы маалыматтарга таянсак, 11 адамдын сөөгү табылды.

Бул арада учактын бортундагы жүргүнчүлөрдүн аты-жөнү боюнча социалдык тармактарда издөө жүргүзүп, LIFE басылмасы алардын бир нечесинин сүрөттөрүн жарыялады. Сүрөттөрдөн жалаң жаш курактагы муундун өкүлдөрүн көрүүгө болот.

Эске сала кетсек, бортто Орусиянын аскер кызматкерлери жана Сириядагы орус аскерлерин Жаңы жылы менен куттуктоо үчүн бараткан Орусиянын Коргоо министрлигинин алдындагы Александров атындагы ыр-бий ансамблинин артисттери болгон. Ошондой эле "Биринчи канал", "Звезда" жана НТВ телеканалдарынан 9 журналист чагылдыруу иштери боюнча бара жаткан.