Өлкө боюнча кайсы шаардын балатысы бийик? (инфографика)

Дүйнө жүзү боюнча белгиленген Жаңы жыл майрамы жакындаган сайын Кыргыз жергесиндеги шаарлар, райондор көчөлөрүн жасалгалап, борбордук аянттарына балатыларды орнотуп жатышат. 2017-жылды тосууга өзгөчө камылга көргөн шаар Бишкек болду. Борбордун көчөлөрүн, "Ала-Тоо" аянтын кооздоого, балатыны орнотууга эле 13 миллион сом бөлүнгөн.

Ал эми өлкөбүздүн экинчи борбору болгон Ош шаарынын мэриясы 30 метрлик балаты менен борбордук аянтты 899 миң сомго жасалгалаган.

Ысык-Көл облусунун Чолпон-Ата шаарынын балатысы 75 миң сомго орнотулган. Анын бийиктиги - 10 метр, диаметри - 5 метр.

Каракол шаарынын балатысын орнотууга 100 миң сом бөлүнгөн. Бийиктиги - 20 метр.

Талас шаарына 96 миң сомго көк карагай орнотулган, анын бийиктиги 10,5 метрди түзөт."Балаты борбордук аянттын батыш тарабындагы музыкалык мектептин тушуна орнотулду. Гирлянда, шар, светодиоддук кар бүртүкчөлөрү жана светодиоддук жасалга менен кооздолгон", - деп билдиришти Талас шаарынын мэриясынан.

Нарын шаарына 2 балаты орнотулган. Балатыларга жана шаар ичин жасалгалоого жергиликтүү бюджеттен 150 миң сом бөлүнгөнүн айтат өкмөттүн Нарын облусундагы ыйгарым укуктуу өкүлүнүн басма сөз катчысы Айнура Дүйшөк кызы.
"Борбордук аянтка бийиктиги 18 метр балаты орнотулду. Ушундай эле балаты "Ала-Тоо" стадионуна орнотулган, себеби ал жакка шаардыктар үчүн муз аянтчасы да уюштурулуп, эс алууга ылайыкташтырылган", - дейт А.Дүйшөк кызы.

Баткен шаарындагы балатынын бийиктиги 11,5 метрди түзөт. Шаарды көрктөндүрүү иштери менен Жаңы жыл күнү өтө турган оюн-зоок программасына жалпысынан жергиликтүү бюджеттен 114 миң сом бөлүнгөн.

Токмок шаарынын балатысынын бийиктиги 13 метр болсо, диаметри 6 метрди түзөт. Балатыны орнотууга, аны жана борбордук аянтты кооздоого 32 миң сом бөлүнгөн.

Кербен шаарына бийиктиги 15 метр болгон балаты орнотулган.

Жалал-Абад шаарын Жаңы жылга карата жасалгалоо үчүн жалпысынан шаар бюджетинен 600 миң сом каралган. Майрамдык салтанатка жасалгалоо иштери алгач борбордук аянтка бийиктиги 20 метрди түзгөн балатыны тургузуу менен башталган.

Ошондой эле Балыкчы шаарына бийиктиги 12 метрлик балаты коюлду, жасалгалоого 1500 метрден ашуун гирлянда кетип, кар бүртүкчөлөрү, жарыктандыруучу элементтер менен кооздолгон.

"Балатыны орнотууда шаарыбызга мүнөздүү катуу шамалдын күчүн да эске алуу зарыл болду, себеби ал жасалгаларды учуруп же сындырып кетиши мүмкүн. Балатыны жасалгалоого атайын 12 дизайнер чакырылган. Ошондой эле борбордук аянтта балатыдан тышкары "2017" деген жазуусу менен жаңы жылдык инсталляция коюлган", - деп билдиришти мэриянын басма сөз кызматы.

ИНФОГРАФИКА