Ноокат районундагы оңдолбой жаткан көпүрөдө күн сайын кырсык катталууда

Ноокат районундагы Көк-Жар жана Он-Эки-Бел айыл өкмөттөрүнүн ортосундагы оңдолбой жаткан көпүрөдө күн сайын кырсык катталууда. Бул тууралуу бүгүн, 30-декабрда SUPER.KG порталына Он-Эки-Бел айыл өкмөтүнүн башчысы Кутманбек Турсункулов билдирди.

"Бул көпүрөдөн Көк-Жар жана Он-Эки-Бел айыл өкмөтүнүн эли өтөт. Көпүрө айыл өкмөттүн карамагында эмес. Транспорт министрлигинин балансында турат. 2016-жылы оңдолот деп жаткан болчу, бирок быйыл курулуш башталган жок. Унаа өтүүчү көпүрөдө күн сайын кырсык катталууда. Быйыл көпүрөнүн бузулган абалда жатканына 3 жыл болот", - деп билдирди айыл аймак башчысы.

Эске салсак, окурман 29-декабрда "Элдик кабарга" көпүрө 2 жылдан бери оңдолбой жатканын, мындан улам оор жүк ташуучу унаалардын бири оодарылып кеткенин билдирген.