Кайрат Примбердиев "Голос" теледолбоорунун жеңүүчүсү болууга 2 кадам жетпей калды (жаңыланды)

Кыргыз ырчысы Кайрат Примбердиев жергиликтүү убакыт боюнча бүгүн, 31-декабрда өткөн орусиялык "Голос" музыкалык сынагынын финалында жеңүүчү болууга болгону 2 кадам жетпей калды.

Долбоордун финалы азыркы маалда популярдуу болуп жаткан "Манекен чэлленж" флешмобу менен башталып, алып баруучу Дмитрий Нагиев ачты. Андан соң 4 финалчынын ыры менен уланды. Кайрат Примбердиев "02" номери менен чыкса, анын атаандаштары Сардор Милано биринчи, Александр Панайотов үчүнчү жана Дарья Антонюк төртүнчү болуп чыгышты.

Финалдын алгачкы бөлүгүндө ар бир финалчы насаатчысы менен дуэт ырдады. Кайрат Примбердиев жана насаатчысы Дима Билан "Trouble" аттуу ырды ырдашты. Айта кетсек, Дима Билан Кайрат Примбердиевдин үнү өзгөчө экенин белгиледи. Экинчи бөлүгүндө катышуучулар жеке номерлери менен чыгышты. Кайрат Примбердиев Александр Градский аткарган Александра Пахмутованын "Как молоды мы были" ырын ырдады.

"Мен долбоорго катышууга билдирме жиберип жатканымда эле финалды элестеткем. Финал менин кыялым болчу. Каалооң күч болсо, аткарыларына ишенем. Сахнага чыгардан мурун ар дайым Кудайдан жеңишке жеткирүүсүн суранам. Ал үчүн мен күйөрмандар ишенгидей ырдап, добушун алышым керек", - деди Примбердиев өз сөзүндө.

Күйөрмандардын тандоосу менен үчилтикке Дарья Антонюк, Александр Панайотов жана Кайрат Примбердиев кирип, Сардор Милано көрүүчүлөрдүн катарын толуктады.

Финалдын үчүнчү бөлүгүндө Кайрат Примбердиев Жо Кокердин "Unchain My Heart" ырын ырдап, тилекке каршы, жетиштүү санда добуш ала албай, долбоордун жеңүүчүсү аталбай калды.

Өз сөзүндө ырчы насаатчысына, жакындарына, апасына, жубайына жана аны колдогондорго ыраазычылыгын билдирди.

Ал эми жеңүүчү деп Дарья Антонюк табылып, 1 миллион рубль жана статуэтка менен сыйланды, калган катышуучулар 100 миңден алышары белгилүү болду. Долбоор финалчылардын "Жить" ырын аткарышы менен жабылды.