Кыргыз Республикасы Ислам өнүктүрүү банкынан Түндүк-Түштүк альтернативдүү жолунун бир бөлүгүн реконструкциялоо үчүн насыя алат

Кыргыз Республикасы Ислам өнүктүрүү банкынан Түндүк-Түштүк альтернативдүү жолунун 159-183-чакырымдарын реконструкциялоо үчүн насыя алат. Бул тууралуу президенттик аппараттын басма сөз кызматы кабарлады.

"Алмазбек Атамбаев 2016-жылдын 9-июнунда Сауд Арабия Падышалыгынын Жидда шаарында кол коюлган Кыргыз Республикасы менен Ислам өнүктүрүү банкынын ортосундагы Түндүк-Түштүк (Балыкчы-Жалал-Абад) альтернативдүү автоунаа жолунун 159-183-чакырымын реконструкциялоо долбооруна тийиштүү "Кредиттик макулдашууну ратификациялоо жөнүндө” Кыргыз Республикасынын мыйзамына кол койду", - деп айтылат маалыматта.

Мыйзам 2016-жылдын 24-ноябрында Жогорку Кеңеш тарабынан кабыл алынган. Макулдашуунун максаты – өлкөнүн түндүгү менен түштүгүн тутамдаш, үзгүлтүксүз транспорттук жол каттамы менен камсыз кылуу. Макулдашууда Түндүк-Түштүк альтернативдүү жолунун аталган чакырымдарын кайра калыбына келтирүү каралган.

Маалыматка ылайык, каражат Түндүк-Түштүк альтернативдүү автоунаа жолунун тилкелеринин абалын жакшыртуу, анын ичинде жер жана дренаждык иштердин жүргүзүлүшү, асфальт төшөө жана көпүрөлөрдүн реконструкциясы үчүн пайдаланылат. Мыйзам расмий жарыяланган күндөн тартып күчүнө кирет.