Бийликтеги партиянын өкүлдөрү Жогорку Кеңеш тарабай турганын айтышууда

Бийликтеги партиянын өкүлдөрү Жогорку Кеңештин 6-чакырылышын мөөнөтүнөн мурда таратууга негиз жок экенин айтышууда. Парламенттин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин регламенти комитетинин жетекчиси Асел Кодуранова (КСДП) парламентти таратуу сунушуна макул эмес.

"Депутаттык мандатын тапшырып, ыйгарым укуктарын мөөнөтүнөн мурда токтотуу - депутаттын өз укугу. Бирок парламентти таратууга негиз деле жок. Жогорку Кеңештин азыркы чакырылышы өзүнүн конституциялык мөөнөтүнүн аягына чейин иштөөгө тийиш. Мындан ары кандай саясат жүрөт, аны көрө жатарбыз", - деди Кодуранова.

Белгилей кетсек, депутаттар арасында парламентти мөөнөтүнөн мурда таратуу үчүн кол топтоо жүрүп жатканы айтылууда. Президенттин парламенттеги өкүлү Молдакун Абдылдаевдин ырасташынча, ал үчүн 61 депутаттын добушу керек. Конституцияга ылайык, парламент тараса, президент 5 күндүн ичинде мөөнөтүнөн мурун шайлоо дайындап, 45 күнгө чейин жаңы парламенттик шайлоо өтүшү керек болот.